নববৰ্ষৰ পহিলা দিনাই কৃষ্ণগহ্বৰৰ অন্বেষণৰ বাবে ইছৰোই উৎক্ষেপণ কৰিলে এক্সপ'ছেট

ইছৰোই ইংৰাজী নববৰ্ষৰ প্ৰথম দিনাই পোলাৰ চেটেলাইট লঞ্চ ভেহিকেলৰ (পিএছএলভি) চি৫৮ অভিযানৰ অংশ হিচাপে প্ৰথম এক্স-ৰে প’লাৰিমিটাৰ উপগ্ৰহ এক্সপ’ছেট সফলতাৰে উৎক্ষেপণ কৰে। আকাশীৰহস্য মূলত: কৃষ্ণগহ্বৰৰ অন্বেষণৰ ক্ষেত্ৰত ইছৰোৰ এই পদক্ষেপ এক গুৰুত্বপূৰ্ণ সফলতাৰূপে চিহ্নিত হৈছে। উৎক্ষেপনক ইছৰোৰ মুৰব্বী এছ সোমনাথে “সফল” আখ্যা দিয়ে। সোমনাথে কয় যে, "২০২৪ চনৰ ১ জানুৱাৰীত পিএছএলভিৰ আন এক সফল অভিযান সম্পন্ন হৈছে। পিএছএলভি-চি৫৮য়ে প্ৰাথমিক উপগ্ৰহ - এক্সপ'ছেটক - ৬ ডিগ্ৰী হেলনীয়াকৈ ৬৫০ কিলোমিটাৰৰ উদ্দেশ্যপ্ৰণোদিত কক্ষপথত স্থাপন কৰিছে।" "পিএছএলভি উৎক্ষেপণৰ লগে লগে নতুন বছৰটো আৰম্ভ হ'ল, আৰু আমাৰ বাবে সমাগত সময় ৰোমাঞ্চকৰ হ'ব। এই বছৰ মাত্ৰ আৰম্ভ হৈছে, আৰু আমাৰ আৰু অনেক উৎক্ষেপণ কাৰ্যসূচী আছে! তদুপৰি ২০২৪ চনটো মিছন গগনযানৰ বছৰ হ'ব।" তেওঁ লগতে কয়। পুৱা ৯:১০ বজাত অন্ধ্ৰ প্ৰদেশৰ শ্ৰীহৰিকোটাৰ প্ৰথমটো লঞ্চ পেডৰ পৰা আকাশলৈ উৰা মাৰে ৪৪.৪ মিটাৰ উচ্চতাৰ পি এছ এল ভি ৰকেট। লিফট অফৰ সময়ত চেন্নাইৰ পৰা ১৩৫ কিলোমিটাৰ পূবে অৱস্থিত মহাকাশ বন্দৰত সমবেত হোৱা একাংশ দৰ্শকে বিপুল হাতচাপৰিৰে উল্লাস প্ৰদৰ্শন কৰে। মহাকাশত তীব্ৰ এক্স-ৰে উৎসৰ মেৰুকৰণৰ তথ্য আহৰণৰ অভিযানত নামিবলৈ সাজু হৈছে এক্সপ’ছেটক ৬৫০ কিলোমিটাৰ নিম্ন পৃথিৱী কক্ষপথত স্থাপন কৰা হৈছে। XPoSat ৰ প্ৰাথমিক পেলোডত POLIX (এক্স-ৰেত পোলাৰিমিটাৰ যন্ত্ৰ) আৰু XSPECT (এক্স-ৰে স্পেকট্ৰস্কপি আৰু সময়) অন্তৰ্ভুক্ত কৰা হৈছে। ৰমন ৰিচাৰ্চ ইনষ্টিটিউটৰ দ্বাৰা ডিজাইন কৰা পলিক্সে মেৰুমিট্ৰিৰ পৰিমাপ জুখিবলৈ সহায়ক হোৱাৰ বিপৰীতে বেংগালুৰুৰ ইউ আৰ ৰাও উপগ্ৰহ কেন্দ্ৰৰ দ্বাৰা নিৰ্মিত এক্সএছপিইটিয়ে এক্স-ৰে বৰ্ণালীবিজ্ঞান আৰু সময়ৰ ওপৰত গুৰুত্ব আৰোপ কৰে। এই অভিযানৰ আয়ুস প্ৰায় পাঁচ বছৰ হ’ব বুলি আশা কৰা হৈছে, যি হ'ব বৈজ্ঞানিক পৰ্যবেক্ষণ আৰু তথ্য সংগ্ৰহৰ বাবে এক বৰ্ধিত সময়।